ТОМ ГИЖЫСЬЯСЛЫ ИНДӦДЪЯС (ПОЖЕЛАНИЯ МОЛОДЫМ ПИСАТЕЛЯМ)
Нёбдінса Виттор
ТОМ ГИЖЫСЬЯСЛЫ ИНДӦДЪЯС
Ӧтарсянь кӧ босьтны, унаӧн чайтӧны: гижысь пӧ сідзи нин и чужлӧ гижан талантнас, сэсся быдмас да лоӧ ыджыд гижысьӧн, нималан поэтӧн.
Мӧдарсянь кӧ босьтны, кывлывлан татшӧм сёрнияс: мый нӧ пӧ сійӧ гижныд – зэв кокньыд, ичӧтика кӧ грамотнӧй да кужан кӧ ассьыд мӧвпъястӧ кабала вылӧ пасъявны – верман нин пӧрны гижысьӧ.
Колӧ шуны, тайӧ некоднан сёрниыс абу веськыд. Ни ӧти морт гижысьӧн оз чужлы. Гижан удж – сьӧкыд удж, ичӧтик грамотаӧн нӧшта сьӧкыд лоны гижысьӧн.
Медым лоны гижысьӧн, колӧ бура тӧдны грамматика да литература кыв, сэсся олан кадыслысь ногсӧ, условийӧяссӧ, политикасӧ. Сӧветскӧй, пролетарскӧй гижысьлы колӧ тӧдны классӧвӧй тыш йылысь, марксизм-ленинизм велӧдӧм йылысь, коммунист партиялысь туйвизьсӧ. Тайӧясӧс кӧ он бура тӧд, он вермы лоны сӧветскӧй бур гижысьӧн. Сэсся, дерт, колӧ лыддьыны (велӧдчыны) воддза и ӧнія классикъяслысь – ыджыд гижысьяслысь да бур литературнӧй индӧдъяс (руководствояс) серти.
Медым лоны гижысьӧн, колӧ тшӧтш и ас вылад ёна уджавны – чорыда уджавны, мырдӧн, упорнӧя, дугдывтӧг зільӧмӧн.
Художествоа литература, мый вылын уджалӧ гижысь, – абу сӧмын прӧстӧй руд гижӧд, а бура дӧзьӧритӧм, шыльӧдӧм, весалӧм, мича серӧн вӧччӧдӧм гижӧд, мед вӧлі ортсысяньыс пасьтӧдӧма югъялан мича кывъясӧн, дай пытшкӧссяньыс эз вӧв омӧль, – пытшкӧсыс торъя нин бур колӧ, сійӧ ӧд гижӧдыдлӧн сьӧлӧмыс, вемыс.
Художествоа коми литература чужис Октябрса революция бӧрын. Сэтчӧдз эз вӧв весиг комилӧн гижан пасыс (письменность). Сы понда позьӧ шуны, коми литература зэв на том. Но коми литература миян эм нин, дай бура вылӧ нин кыптіс. Коми гижысьяс сідзжӧ вочасӧн выльысь петӧны уджалысьяс пӧвстысь. Со ме водзын куйлӧ бура ыджыд кабала чукӧр, сэні ставыс – том коми гижысьяслӧн удж, – томӧн лыддям огӧ арлыд сертиыс, а неважӧн гижны босьтчӧмнысла. Унджык гижӧдыс кывбуръяс. Колӧ водзвыв шуны: кывбур гижны ёна сьӧкыд висьт (проза) гижӧм дорысь. А миян унджык том гижысьыс заводитӧ буретш кывбурсянь туйдасьны. Ӧд кывбурӧ колӧ размер, такт да рифма, сэсся художество боксянь колӧ нӧшта мичаджык прозаысь да и ставнас сыысь шыльыдджык, дженьыдджык, ёсьджык. Коми том гижысьяслӧн буретш тайӧ качествоясыс и абуӧсь кывбураныс. Сы вӧсна кывбурныс артмӧ жебиник проза кодь, сӧмын гижӧма кывбур модаӧн-а. Тайӧ – медыджыд тырмытӧмтор. Мӧд-кӧ, тематикаӧн (сюрӧсӧн) ӧнӧдз на пыр унджык гижысьыс босьтӧ Октябрса революция дырйи вӧля перйӧм йылысь, нартитысьясысь мездысьӧм йылысь, либӧ гражданскӧй война дырйи миян вермӧм йылысь. Дерт, шуам, тайӧ темаясыс некор оз сёрмыны, но ӧд ӧні колӧ нин бергӧдчыны и стрӧительстволань банӧн, – тайӧ фронт вывсьыс, майбырӧй, позьӧ корсьны быдсяма сюрӧстӧ гижӧдыдлы! Сэсся тӧдчӧ, том гижысьяслӧн оз тырмы непӧштӧ политическӧй, но и прӧстӧй (элементарнӧй) грамотаныс, торъя нин коми грамматика вылын ёна чотӧны.
Гижан удж – зэв сложнӧй ремеслӧ, другӧн оз артмы гӧгӧрбок шыльыд да бур гижӧд. Сы вылын колӧ кузя уджавны, паськӧдны ассьыд тӧдӧмлунтӧ (кругозор) да бурмӧдны гижан техника. Ме ог кӧсйы тайӧ индӧдъяснас серавлыны том гижысьяслысь медводдза петасъяснысӧ, сӧмын кӧсъя сетны налы водзӧ уджалӧм вылӧ туйдӧдъяс. Эм кӧ тэнад окотаыд, кыскӧ кӧ тэнӧ сьӧлӧмыд гижан удж вылас, – эн эновтчы сыысь, а водзӧ пыр зіль гижны, да гиж уджалысь йӧзлы тӧдса кывйӧн, мед гӧгӧрвоисны. А ӧшыбкаяс кӧ лолывлӧны – зіль водзӧ кежлӧ бырӧдны. Ме ачымӧс босьта: комын арӧсӧдз ме эг гижлы; кор заводиті гижны – кымын ӧшыбка да нелючки артмывліс! Ӧні, дас витӧд во гижӧм мысти, ачым аддза ассьым ӧшыбкаясӧс, дай ӧні на мукӧддырйиыс джӧмдыла, но ог эновтчы – мый верма дай сямма, пыр гижа, зіля бурмӧдны гижӧдъясӧс ортсысяньыс и пытшкӧссяньыс. Сӧмын ӧтиторйӧн ме эг вежсьы – ме гижа коми уджалысь йӧзлы гӧгӧрвоана кывйӧн.
Ӧні сэсся видзӧдлам гижӧд чукӧрсӧ, видлам, кодлӧн мый артмӧма.
- КЫВБУРЪЯС
Со Югов ёрт (Лопыдінын велӧдысь) гижӧма кывбур „Капитал кулас“. Мыйысь, чайтанныд, кулас капиталыд?
„Мед жӧ сісь капиталлы
Ӧдйӧджык матыстчас пом,
Наяса пирлы да баллы
Тупкамӧ свинечӧн вом.
Ставыслы сюрас ки улӧ
Чер, либӧ зыр, либӧ пурт.
Тайӧн на капитал кулӧ,
Водзӧ мед сэсся оз дзурт“.
Дерт, тайӧ гижӧма заграничаса капитал йылысь, сӧмын артмӧма зэв кокньыда сійӧс виӧмыс: пирлы да баллы свинечӧн тупкыны вом (?). Ми тӧдам, капиталӧс кабыртӧма кризис, но капитал ён на, черӧн либӧ зырйӧн да пуртӧн он на начкы сійӧс, колӧ кутшӧмкӧ мӧд пӧлӧс оружйӧ, медвойдӧр – пролетариатлӧн ӧтувтчӧм.
Босьтам М. Геройлысь (Пажгаысь) кывбур „ХV во“. Тані сійӧ висьталӧ первой гражданскӧй война йылысь, сэсся ӧнія стройкаӧдз воӧ. Сӧмын колӧ шуны, Геройлӧн артмӧма прӧстӧй кывъяс чукӧртӧм (кывбертас), рочӧн кӧ – безалаберный подбор слов:
„Горзӧны „ок“
Чегӧма кок
Сотӧма би
Йӧзыслысь ки
Усьӧны пласьт
Му вылын страсьт
Порок тшын лӧз
Усьӧны йӧз
Куим во чӧж
Мырсисны йӧз
Воис выль кад
Кыптіс гӧрд плаг“ да тадзи водзӧ,
ставыс 96 строчка (визь). Помланяс эм татшӧм строфа (куплет):
„Но сӧмын сэні (капитал странаясын Н. В.)
Уджалысь йӧз
Оз ёна видзӧд
Найӧлысь грӧзд“.
Позьӧ тадзи гижны не 96, а 960 визь, сӧмын тӧлкыс нинӧм оз ло. Абу тані художество ни политика тӧдӧм. Шуам кӧть: гӧрд плагыс ӧд миян кыптыліс ёна войдӧрджык, а эз куим во чӧж тышкасьӧм бӧрын; став мувывса робочӧй класс ёна видзӧдӧ капиталистъяс грӧз вылӧ, не сійӧ кӧ ӧд, важӧн нин эськӧ уськӧдчисны капиталистъяс СССР вылӧ. Сэсся рифмаяс шлачкалӧ кытчӧ кутшӧмсюрӧ:
„Олӧмыс ёсь,
Мунӧ на кось,
Классӧвӧй враг
Ёна на зяг (?)
Капитал страна
Джельскӧ на бара
Бырӧдны шлач (?)
Сӧветскӧй власьт“.
Тӧдчӧ, гижӧма кывбурсӧ ӧти здукӧн, места вылысь чеччывтӧг, тэрмасьӧмӧн, некӧн некутшӧм пас (запятая ни точка) абу, весиг мукӧд кывсӧ помавтӧг колялӧма. Тадзи художествоа гижӧд, нӧшта нин кывбур, страпайтны оз позь. Мӧд кывбур Геройлӧн эм «Сиа Гаврил Иванлы» (вӧр фронтвывса ударник-герой). Тайӧ неуна бурджык „ХV во“ дорысь. Эм весиг прамӧй мичаинъяс:
„Вӧр – менам фронт,
Зымгӧм – революция,
Винтовка – паськыд дора чер,
А пуля –
Быд пӧрӧдӧм пу,
Быд вӧчӧм кер.
План –
Сюрс кубометра вӧр!“
Та серти позьӧ чайтны: М. Герой кӧ бурджыка зільӧмӧн кутас уджавны, вермас петны гижысьӧ.
А вот Луз Ваньлӧн (пединститутын велӧдчӧ) „Октябрлы 15 во тырӧм кузьта“ кывбурыс нӧшта нин жеба артмӧма:
„Ывла выв тыр
Петӧны йӧз.
СССР пасьта
Уджалысь йӧз.
Йӧз пӧвстын тыр,
Дзирдалӧ гӧрд!
Уджалысь киын
Гӧрд дӧрапас...
Кулаклысь мышку
Чегӧма шӧрӧд...
Матысмӧ класстӧм
Социалистическӧй
Общество!
Мед олас дас витӧд вося Октябр
лун!“
Тайӧ „кывбурсӧ“ оз позь весиг шуны художествоа прозаӧн, тайӧ прӧстӧй стаття. Сэтшӧмӧсь жӧ Луз Ваньлӧн и мукӧд кывбуръясыс: „Ыджыд вынӧн – ыджыд шагӧн“ да „Сьӧдмӧма видз“. Первойяас гижӧ:
„Восьтӧма ӧні базар,
Вайӧ колхозник тӧвар!
Ньӧбӧны уджалысь йӧз,
Мый колӧ аслыс тӧвар.
Кывзӧй, кывзӧй, ёртъяс! колхозникъяс!
Мӧд, вит вося планӧн ми дорам!
Ён, класстӧм социалистическӧй
Общество!“
Ме наросьнӧ эг веськӧдлы сылысь гижӧдсӧ (кыдзи ачыс гижӧма – сідзи и петкӧдлі). Тыдалӧ, Луз Вань грамматиканас ёна на дзескыда бертлӧ. Сэсся некутшӧм гижан техника оз тыдав: размер ни, ритм ни, рифма ни, нинӧм абу, а медся лёкыс — содержанньӧыс омӧль да художествоыс войт мында абу веськалӧма.
Оз ёна торъяв прӧстӧй кывбертасысь да статтяысь и Вась Педӧрлӧн кык кывбур: „Кымӧр бӧрын“ да „Тыртам мӧд вит вося план“. Ӧтикас гражданскӧй война помасьӧмбӧрся олӧм йылысь символикаӧн гижӧма; мӧдсӧ кӧсйӧма оратория ногӧн лӧсьӧдны. Сӧмын некоднаныс абу артмӧма.
„Юр вылын помтӧма
Кымӧръяс кывтӧны,
Зэр тусьяс точкӧны,
Ва вылӧ сяльгӧны.
Сынӧдӧд бок ногӧн,
Кузяла, вомӧнӧн,
Увгӧмӧн, залӧмӧн,
Мунӧны, —
Усьӧны зэр войтъяс...
Дыр тадзи муніс,
Дыр тадзи пызйис
Сьӧд кымӧрсянь зэр,
Дыр тадзи эргис,
Свинечӧн сьӧвзис
Капитал – звер.“
Вот, сійӧ и эм: „свинечӧн сьӧвзис капитал-звер“, а эз небыдик зэр моз точкы да сяльгы, Педӧр ёрт! Сідзкӧ нӧ мыйла сэтшӧм кывъяссӧ колӧ вӧлі сэтчӧ сюйны?
Сэсся сэні жӧ кутшӧмкӧ пӧрысь Парась тьӧт велӧдчӧма лыддьысьны да шуӧ:
„Ӧдйӧ велӧдчи ме тадзи,
Пӧрысь юрыд абу том,
Ӧні газет-книга лыддя,
Сідзи и боргӧ менам вом“.
Артмӧ, быттьӧкӧ пӧрысь юрӧн ӧдйӧджык позьӧ велӧдчыны да велавны. Ӧдвакӧ сідзи. Мӧдлаын Вась Педӧр гижӧ:
„Сьӧлӧмыс (капиталистлӧн – Н. В.)
Сё градуса би пытшкын сотчӧ,
Быдсӧн дрӧжжитӧ яй.
Сьӧлӧмыс сотчӧмла
Оз тӧр ку пиас,
Крейсерӧн, пушкаӧн,
Танкъясӧн уськӧдча, —
СССР – „Дай“!..
„Русскӧй штыкыд зэв ёсь...“
Ньӧти абу художественнӧя шуӧм. Либӧ со:
„Магнитогорск, Днепрострой,
Волковстрой – кыптӧны“.
Оз ков вывті ышмыны гижысьяслы кыв бертлӧдлӧмӧн, колӧ гижны тӧдса да гӧгӧрвоана кывъясӧн. Художестволӧн ӧд доныс абу кывбертасъяс сайын, а буретш мӧдарӧ – мича кывйӧн, йӧзкостса образъясӧн гижӧмын. Мыйлакӧ, вот, ми сэтшӧм донаторсӧ –йӧзкостса мича кывсӧ (фольклор) пыр бокӧ колям да корсьысям кутшӧмкӧ кымӧрсайса выль коми кывъяс, либӧ роч кывъяс. Сэсся вывті веркӧссяньыс петкӧдлам ассьыным быдмӧмнымӧс да стройканымӧс. Сы вӧсна гижӧдным артмӧ зэв схематическӧй, кос сьӧмӧса, общӧй.
Босьтам Вась Польлысь кывбуръяс: „Оз пемды“, „Выль гӧрд знамя“ да „Сё дявӧла-беса“. Сэтшӧм жӧ тыртӧм куш кывбертасъяс:
„Войдӧр вӧвлі поп:
Шоча ачыс ноп,
Тӧдліс сійӧ „епископ“
Ӧні ми горӧдім „стоп!“
Поплӧн ёрт
Кона Вань Ёгор (стӧрӧж)
Сылӧн дерт
Киас пыр багор (?).
Мед жӧ рай местаад – ад, (?)
Стӧрӧжалысь Ёгор дядь.
Сё дявӧла-беса,
Ыджыд лунъя асъя,
Вичкоын старука,
Нардомын чудеса“ (?).
Мый сэсся татчӧ содтан? Сідзи нин гӧгӧрвоана – жеб, слаб кывбертас. Дерт, татшӧм „поэзияыд“ некодлы оз йидж сьӧлӧмас ни юрас.
Гриваса Василь Ёгор – „Жоржик“ (ВУЗ-ӧ велӧдчан курс вылын) ыстӧма 5 кывбур. Сӧмын ставыс жӧ общӧй, куш кывъясӧн бергалӧм, а художествоыс да сюрӧсыс абу. Со „Октябр“ кывбурын вит куплет, да ставыс ӧтитор шуӧ – быд куплет ӧткодь, тадзи заводитчӧны куплетъяс:
1) „Коді нӧ Романлысь черань вез орйӧдліс?“
2) „Коді нӧ векӧвӧй чеп сарлысь разьӧдіс?“
3) „Коді нӧ енэжысь лёк кымӧр весаліс?“
4) „Коді нӧ сё пудъя гирасӧ шыбитіс?“
5) „Коді нӧ вӧля власьт миянлы шедӧдіс?“
Быд куплет помасьӧ ӧтветӧн – „Октябр“. Позьӧ вӧлі ӧти куплетӧн ставсӧ и шуны. Либӧ босьтам мӧдӧс – „Мед тӧдасны“. Сійӧ чуксалӧ комсомолечьясӧс лоны дасьӧн, врагъяс кӧ кыпӧдасны миян вылӧ кось, со кыдзи:
„Ать, два, тӧварышъяс, водзӧ!
Ленин ёрт тадзикӧн миянлы дольліс...
Ворошиловным миян – винтовкаӧн,
Будённӧйлӧн – конница вӧвъясӧн пызйӧ“.
Бурджыка кӧ мӧвпыштіс „Жоржик“, гашкӧ эськӧ и гӧгӧрвоис: конница вӧвъясӧн оз вермы пызйыны, конницаыс ӧд ачыс и эм вӧвъяса отрадыс. Сэсся грамматикаӧн торксялӧма: „Сикт кузя мунӧны бригада Ӧльӧлӧн. Пельпомын нуӧны косаяс найӧлӧн“.
Артмӧма кутшӧмкӧ гӧгӧрвотӧм кывбертас: „бригада мунӧны, пельпомын нуӧны косаяс найӧлӧн», – мый и лоӧ? Сэтшӧм жӧ и помыс тайӧ кывбурыслӧн („Колхознӧй асыв“):
„Вежсьӧны сиктъяслӧн бан!“ Татшӧм дзугсялӧмъясыс не куш „Жоржиклӧн“ – уналӧн эмӧсь.
Ёгор Семӧ гижӧ сідз жӧ образъястӧг, художество сертӧг, прӧстӧй кывъяс чукӧртӧмӧн. Сэсся пытшкӧсас оз видзӧдлы:
„Ми стрӧитам, ми стрӧитам,
Кӧть вой тӧв пӧльтӧ тан,
Ми стрӧитам, ми стрӧитам
Социализм тэчан план“.
Ми стрӧитам... ми огӧ нин плансӧ стрӧитӧ, ми стрӧитам асьсӧ социализмсӧ! Либӧ мӧд кывбурын – „Ёрт, кылан!“ – гижӧ:
„Ёрт! Пемыд войясын медым
Вӧлімӧ ми дасьӧсь быд здук,
Локтысь вӧрӧглысь медым ми вермим
Видлавны асланым штыкъясӧн бок“.
Сӧмын ӧмӧй пемыд войясын колӧ лоны дасьнас? Колӧ и югыд лунъясӧ лоны дасьӧн. Сэсся бара жӧ колӧ шуны, тайӧ – абу кывбур, тайӧ стаття, сэтшӧм и помыс весиг сылӧн: „Медым эз вермы пушка ни газъяс миянӧс венны некӧн и некор, быд водзын сулалӧны зэв гырысь могъяс: война техника босьтны абу некор сёр“. Дерт жӧ тані поэзиялӧн дукыс весиг абу, да и висьт вылӧ оз мун, – скодитӧ жебиник статтялань. Ёгор Семӧлӧн эм ӧти кывбур „Армияӧ муна“, кодлӧн темаыс (сюрӧсыс) эськӧ и ӧнія удж йылысь, сӧмын тэчӧма сідз жӧ омӧля, некутшӧм художество ни техника абу.
Статтяяс ногаӧсь жӧ кывбуръяс и татшӧм том гижысьяслӧн: Прокӧ Васьлӧн „Тракторлӧн гӧрӧм“ да „Кутшӧма выль олӧм паськалӧ“. К. Кармановлӧн „Арся кылӧмъяс“, Емва пилӧн (А. Злобинлӧн) „Гажтӧм висьӧм“ да „Тыртам план“. Налимов Опонь Васьлӧн „Ми стрӧитам“, „Вӧрзьывтӧм из“ да „Арын“. Опонь Вась „Вӧрзьывтӧм из“нас кӧсйӧма вӧтчыны (подражайтны) Выль Пашлы:
„Вӧр...
Сикт...
Кар...
Сывйыштіс
Нёль воӧн —
Вит вося план.
Заводъяс!
Гигантъяс!
Машина!“
Сӧмын тай, со – нинӧм абу артмӧма. „Арын“-ас кӧсйӧма менам „Арся мойдкыв“ вылӧ подражайтны, да абу жӧ гартчӧма. Сэсся менам вӧлі гижӧма мойд воддза олӧм йылысь (1919 воын), а Опонь Вась гижӧ ӧнія ӧда гажа олӧм йылысь (1932 воын) – гижӧ «гажтӧм ар» йылысь збыльтор пыдди:
„Воис мисьтӧм зэв няйт ар...
Жугыльтчӧма сьӧлӧмыс
Войвывса йӧзлӧн,
Челядьлӧн оз нин кыв шум,
Ланьтӧма ставыс...“
Тайӧ – абу веськыд шуӧм: мыйла „жугыльтчӧма сьӧлӧмыс войвывса йӧзлӧн“? Найӧ пыр удж вылынӧсь, некор жугыльтчыныс, да и нинӧмысь. Удж миян СССР-ын – „доблесьт, геройство да чесьт“.
Сэсся нӧшта эмӧсь стаття кодь кывбуръяс: Н. Мартюшёвлӧн „Мӧс лысьтӧм“, И. Панюковлӧн (Донысь) „Миян олӧм“, Мить Ӧльӧлӧн „Кык кулак“ (зэв слаб сюрӧсыс, прӧстӧй „басни“ кодь), Герклӧн „Колхознӧй му вылӧ“, Ан. Ал. Тим.-лӧн „Воддза олӧм“.
Бура кузь кывбур „Ягса музыка“ гижӧма А. Размыслов. Кытсюрӧ артмӧма лӧсьыдакодь:
„Бушков пӧльыштіс,
Свистӧн горӧдіс.
Войбыд тӧвкӧд вӧр
Ворсіс хоровод.
Ворс тэ гудӧкнад,
Войвыв ывла выв,
Пуяс-клавишас
Збоя личкавлы...“
А ставнас кӧ босьтны кывбурсӧ – вывті ёна гудралӧма:
„Ыджыд пӧртйын рок
Сука сукмӧма.
Барак дорын коз
Еджыд сукмана.
Пуяс гылалӧ
Лёкысь ружтӧны“.
Размыслов ёртлы колӧ на уджавны гижан техника вылас. Сылӧн эм сямыс лоны гижысьӧн. Тӧдчӧ художество сер да образносьт кывбурас.
Ставсӧ лои видлалӧма 17 гижысьлысь 35 кывбур.
Тайӧн позьӧ ӧні кежлӧ помавлыны кывбуръяс йылысь сёрни. Кутшӧм выводъяс жӧ вермам висьтавны видлалӧм кывбуръяс кузяыс? Ӧти-кӧ, тематика боксянь (мый йылысь гижныс) – том гижысьяс кутчысьӧны зэв общӧя, оз босьтны аслыныс тӧдса ӧнія збыль олӧмсьыс-уджсьыс; мӧд-кӧ, грамотаныс (общӧйыс и политическӧйыс) зэв на улын; коймӧд-кӧ, художество боксянь вывті жебӧсь кывбуръясныс, дзик ньӧти оз гижны образъясӧн, оз пӧльзуйтчыны йӧзкостса сёрни кывйӧн; нёльӧд-кӧ, гижан техниканыс улын. Тайӧ нёль индӧдыс вылӧ том коми гижысьяслы и колӧ медся ёна вниманньӧнысӧ пуктыны кывбуръяс гижигӧн. Ме чайта, тайӧ индӧдъяссӧ сеталӧм бӧрын том коми гижысьяс оз эновтчыны гижӧмысь, а нӧшта ыджыдджык ӧдӧн да зільлунӧн босьтчасны коми художествоа литература уджӧ.
- ВИСЬТЪЯС
Художествоа проза (очерк, висьт, повесьт, роман) литератураын босьтӧ медыджыд места. Миян коми литератураын ӧнӧдз на пыр художествоа проза омӧля паськаліс, гырысь висьтъяс (повесьтъяс) зэв этша, а роман ӧти на весиг абу. Художествоа висьт – дженьыдик, кутшӧмкӧ ӧтитор йылысь, кокньыда гӧгӧрвоан фабулаа (сюжета) гижӧд. Кывбурысь висьт торъялӧ медъёнасӧ форманас да тэчаснас. Висьтын сідзжӧ колӧ художественносьт, кыдзи и кывбурын, но висьтын ыджыдджык вӧляыс гижысьлӧн –вермас сюжетсӧ ёнджыка паськӧдны, оз ков размер ни рифма. Сэсся висьтын овлӧ куим элемент: заводитӧм, паськӧдӧм да помалӧм. Мед вӧлі мыйкӧ ӧтитор йылысь висьтавсьӧ да мед вӧлі мыйӧнкӧ сы йылысь жӧ и помасьӧ – сюжет колӧ, – оз позь гижны сюжеттӧм висьт, сэки лоӧ очерк, либӧ нинӧм оз артмы (куш гижӧд кындзи).
Нӧшта ӧтитор колӧ шуны: быд художествоа гижӧдын (проза кӧть поэзия) мед вӧлі тӧдчӧ ӧнія олӧмлӧн серыс, пролетариатлӧн туйвизьыс – оз вермы лоны художествоа литература класстӧмӧн.
Ӧні видзӧдлам да видлыштам „Ударник“ журналӧ ыстӧм висьтъяс, – эм сӧмын видлавныс нёль висьт, посньыдикӧсь ставыс.
Со Казаков гижӧма казьтылӧм „1919 воын Октябр праздникъяс лунӧ“. Висьтавсьӧ, кыдзи Кӧрткерӧсын (ыджыд сикт Сыктывдін районын, Сыктывкарсянь 49 км) полӧмӧн виччысьӧмаӧсь тайӧ лун вечернянас карсянь еджыдъясӧс. Вой шӧр войын вичкоын звӧнитӧны, йӧз шызьӧ, жӧдзӧ ывла вылын, ойгӧмӧн исполкомын делӧяс пачын сотӧны, Ленинлысь портретсӧ вежӧны син пӧла ӧбразӧн, лэптӧны еджыд плаг; муртса оз ветлыны йӧзыс мельнича дорӧдз еджыдъяслы паныд зіб йыв спасъясӧн. Первойсӧ эськӧ и лӧсьыда заводитӧма Казаков гижныс – кокньыдик юморӧн да ирония сорӧн, сэсся бӧртинас кежӧма аслас стильсьыс да помалӧма прӧстӧй стаття моз. Сӧмын тайӧ висьтыс абу эскана: 1919 вося ноябр 6-д лунӧ Кӧрткерӧс гӧгӧрын (Сыктывкар гӧгӧрын ни) эз на вӧвны еджыдъяс, найӧ Емдінын на сэки сулалісны. Сэсся коммунистъяс – 18 морт – мыйла эз вермыны ӧлӧдны йӧзсӧ паникасьыс? Мыйла эз дугӧдны звӧнитӧмсьыс да исполкомсӧ „вежӧмысь“? Ми тӧдам, еджыдъяс волігӧн зэв уна тешкодьторъяс (курьёзъяс) вӧвліны. Колӧ вӧлі сійӧс нин и гижны (сідзи кӧ нин окота вӧлі Казаков ёртлы тешсӧ Кӧрткерӧслысь петкӧдлыны). Сӧмын тайӧс оз позь шуны дзик висьтӧн, тайӧ — казьтылӧм (очерк кодь), кыдзи и ачыс гижысьыс пасйӧма.
Эм сэсся кык висьт еджыдъяс волӧм йылысь жӧ: Айкинаысь С. Ваньлӧн – „Белӧйдырся (в)олӧм“ да Керчомъяысь М. И. Тарабукинлӧн – „Керчомъяын 1917–18 воясын олӧм“. Кыкнан висьтыс (казьтылӧмъяс) – кизьӧриник статтяяс кодьӧсь, ньӧти шыльӧдтӧмӧсь, шуны кӧ – уль (либӧ нӧ кос) материал, некутшӧм фабула ни, художество ни, интерес ни, нинӧмтор абу, прӧстӧй рудов гижӧдъяс.
Габ Як Микулай (Сыктывкарысь) гижӧма висьт-теш „Ясли“. Кодлы гижӧма татшӧм висьтсӧ? Ме ногӧн, абу сӧветскӧй лыддьысьлы, а мелкобуржуазнӧй, мещанскӧй олысьяслы. „Яслилӧн“ сюжетыс татшӧм: Шоля сиктсӧветын юралысь – Вашля Терень – газетысь лыддяс челядь яслияс восьтӧм йылысь да шуас:
„Вот и восьты татчӧ ясли! Сикт кузяыд весиг ӧти кага абу... Толькӧ Бугун Маръя заводитӧма кызыштны, да код тӧдас, кор на ещӧ сылӧн кагаыс лоӧ... Газетын гижӧны: мераяс примитам! А кодлы сійӧ сюрӧ? Меным! А коді эськӧ сэні мыжа? Коді кагасӧ вайӧ! Ті! – горӧдӧ Вашля аслас гӧтырлы. – Мыйла тэ он вай?..“ да сідз водзӧ.
Собранньӧ чукӧртас Вашля да бара сэні ызгӧ: „Ті ставныд тӧданныд, мый лоӧ „выль кадра“? Сійӧ лоӧ... но... посни челядь... кагаяс... найӧс быдтыны колӧ ясли... Сӧвет власьтлӧн сэтшӧм директива... лоӧ примитӧма решительнӧй мераяс... но кодлы ми восьтам? Кодӧс сэні видзам?..“
Тадзи Габ Як Микулай серавлӧма да вульгаризируйтӧма Сӧвет страналысь ыджыд достиженньӧсӧ – дошкольнӧй учрежденньӧ, кутшӧмыс некӧн сэсся му вылас абу, кутшӧмыс эз вӧвлы весиг йӧз олан историяын некор! Кодлы татшӧм сісь висьтыс кивыв? Дерт, абу миянлы! Оз ков татшӧмыд уджалысь йӧзлы.
Нӧшта ӧти висьт эм Сотчӧм Ваньлӧн – „Павел“. Тайӧ висьтыс зэв прӧстӧй, водзвыв нин тӧдан весиг мыйӧн помасяс, некутшӧм интрига ни, вермасьӧм ни абу тані: Гӧрд Армияысь гортас воас Павел. Овмӧсыс налӧн колхозын. Сэні юралӧ кулак – пытшкӧссяньыс кисьтны зільӧ колхозсӧ, вредитӧ, сьӧм лотайтӧ. Павел аслас невестаыскӧд босьтчасны да вӧтласны кулакӧс колхозысь, а юралысяс бӧръясны Павелӧс. Нинӧм сэтшӧмтор тані абу, прӧстӧй висьт, художество боксяньыс и сюжетнас жебиник, зэв схематическӧй.
- ПЬЕСАЯС
Медся этша коми художествоа литература пиын драматургия (пьесаяс). Сійӧс висьтысь сьӧкыдджык лӧсьӧдны, сійӧн и этша гижӧны. Пьесаын медколанторйыс – петкӧдлыны ловъя йӧзӧн (артистъяс пыр) вермасьӧм кодъяскӧ костысь да мыйяскӧ понда. Тані нин быд участник – торъя тип, торъя сяма мортӧс, либӧ дзонь группаӧс петкӧдлӧ – карактерсӧ и став ногсӧ. Пьесаын колӧ унджык вӧрӧм, этшаджык сёрни, быдсяма пӧлӧс интригаяс, быд ногыс сюжетлӧн бергалӧмыс. Медся интереснӧй пьесаыд сэки, кор видзӧдысь (либӧ лыддьысь) бӧръявылӧдзыс оз гӧгӧрво веськыд помсӧ (развязкасӧ), кор найӧ чайтӧны ӧти ног лоиг, а бергӧдчас дзик мӧдарӧ. Драматурглы колӧ лоны ёна мастерӧн, мед кужис вӧчны бур пьеса. Ме тайӧ удж вылас, позьӧ шуны, унджык кадсӧ пукті аслам став гижан уджысь да, тӧда неуна сы йылысь – сьӧкыд тайӧ формаа уджыд! Оз вӧлі унаысь артмы да, выльысь ковмас вӧлі лӧсьӧдны. „Моль“ ме нёль пӧв гижи, да и сэні на эз артмы прамӧя, а „Рытъя“ лоӧма кулацкӧй пьеса. Со ӧд тайӧ уджыд кутшӧм!
Вот, ӧні видзӧдлам выль гижысьяслысь пьесаяссӧ. Ӧти пьеса „Важ олӧм“ гижӧма кутшӧмкӧ Чаланов М., – тыдалӧ, малограмотнӧй на гижысьыс: рака кок туй кодь гижӧд серыс да весиг ӧти кыв абу гижӧма правильнӧя, да и пьесаыс – прӧстӧй ышмӧм, шутитӧм, челядь шмонитӧм. Пьесаыс 3 торъя, участвуйтӧ 7 морт: крестянин гозъя, налӧн пи да ныв, еджыд опицер да кык салдат. Вӧчсьӧ 1921 воын (кор некутшӧм еджыд нин эз вӧв). 1) Крестянин мунас рытын скод вылӧ. Сэки локтасны шобсьыны опицер да кык салдат; челядь повзясны да дзебсясны; шобсигӧн салдатъяс первой аддзасны детинкаӧс, сійӧ горӧдас – салдатъяс да опицер зэв ёна повзьӧны – ставныс пласьт усьӧны (тешкодь ӧд!); чеччасны да бара шобсьыны пондасны, аддзасны нывкаӧс, сійӧ сідз жӧ горӧдас –еджыдъяс бара пласьт усьӧны; сы бӧрын найӧ юалӧны:
– Тіян тай керканыд олысяӧсь?
Иван (5 арӧса детинка). Олысяӧсь.
Опицер. Но-но... (салдатъяслы). Мунамӧй!
Еджыдъяс „олысяысь“ повзьӧны да мунӧны. Сэки скод вылысь локтас крестяниныд (Степан) да дзебсяс лабич улӧ, керкаӧ бара пырӧны еджыдъясыд да арестуйтӧны Степанӧс. Тайӧн помасьӧ медводдза торйыс. 2) Еджыд опицер аслас патераын вӧчӧ допрос Степанлы. Став торйыс – 1 лист бок – татшӧм:
Опицер. Овыд мый?
Степан. Попов.
Опицер. Нимыд?
Степан. Степан.
Опицер. Мыевич?
Степан. Василльӧвич.
Опицер. Кывзы (лыддьӧ „приказ“ Степанӧс скод вылын пинясьӧмысь арестуйтӧм йылысь).
Степан. Позьӧ кыв шуны?
Опицер (револьвер чургӧдӧ). Ланьт, мерзавец!
Степан (кватитӧ револьверсӧ да лыйӧ опицерсӧ, сэсся салдатъяссӧ, ачыс пышйӧ).
Тайӧн помасьӧ мӧд вӧчӧм. Коймӧдыс – нӧшта дженьыд: 3) Вӧр керка дорын Степан сулалӧ да ӧтнас сёрнитӧ: „Ак-ма, тайкӧ кутасны да эг сюр. Дыр-ӧ бара оз мунны татысь? Краснӧй кӧ эськӧ локтіс татчӧ – вот и бур“. Сійӧ шуигкості друг кылӧ лыйӧм шы. Степан усьӧ муӧ. Локтӧ сы дінӧ красноармееч, видзӧдлӧ да шуӧ: – Ок-ма, краснӧй вӧлӧма да лыйсьӧма!
Степан (чеччӧ). Ме ӧд эг на кув!
Тайӧн и помасьӧ „пьесаыс“. Дерт, таысь нинӧм — челядьлӧн балуйтӧм!
Мӧд пьеса Ив. Козловлӧн – „Чорыдджыка винтовкатӧ кут“, ӧти торъя. Участвуйтӧ 5 морт: пограничник Гриша (гӧрдармееч), ныв Катя (колхозысь), дед (чери кыйысь) да кык шпион (опицер да унтер). Вӧчсьӧ гранича дорын. Катя вайӧ Гришалы гӧснеч колхозсянь, первойысь на тӧдмасьӧны сэки найӧ. Гриша мунӧ караулитны гранича. Локтӧ дед. Бипур вӧчӧ да тшӧктӧ Катялы пестыны, ачыс лэччӧ ю дорӧ – ветельяс кыйны. Сэки локтӧны шпионъяс – юасьӧны туй колхозӧ. Катя пырысь-пыр тӧдӧ найӧс да вензьыны накӧд босьтчӧ, опицер кытчӧкӧ мунас, а унтерсӧ Катя агитируйтас чиганка моз – кисӧ видлалӧмӧн. Опицер воас да тшӧктас Катяӧс кӧртавны да чомйӧ сюйны. Унтер сідзи и вӧчас. Локтас дед да шмонитны кутас шпионъяскӧд. Бӧртинас сэтчӧ жӧ Гриша воӧ. Аддзӧ шпионъясӧс да винтовкасӧ ки йылӧ босьтӧмӧн горӧдӧ: „Руки вверх!“. Опицер наганысь лыяс – ранитас Гришаӧс, но шпионъясӧс кутасны, кӧрталасны. Тайӧн и помасьӧ.
Дерт, татшӧмыс некыдз оз вермы лоны – мойдын кындзи. Кыдзи нӧ позьӧ эскыны татшӧмтор вылӧ? Ӧд еджыд шпионъяс вермисны ставнысӧ, кыдз шуласны, укокошитны. Вывті схематическӧй да идеалистическӧй пьеса артмӧма. Бурджыка петӧма дедлӧн типыс, коді пыр шуӧ Гришалы: „Чорыдджыка винтовкатӧ кут“. Но ӧд куш кывъяснад шуӧмыд – абу на делӧ вӧчӧм. Сы понда тайӧ пьесаыс и слаб.
Пьесаяс гижӧм йылысь ковмас торъя индӧдъяс сетны гижысьяслы, ӧти статтяын он вермы ставсӧ петкӧдлыны.
Ӧні кежлӧ сэсся помавла. Том гижысьяслы колӧ ёна на, ёна велӧдчыны, ыджыдджык требованньӧяс ас водзад сувтӧдавны.
Бурджыка велӧдчӧмӧн, удж вылын зільӧмӧн, гижысь ёртъяс, лӧсьӧдамӧй национальнӧй формаа, социалистическӧй пытшкӧса художествоа коми литература.
.
Том гижысьяслы индöдъяс / Нёбдінса Виттор // Ударник. – 1933. – 2 №. – 34-40 л. б. – Пер. загл.: Пожелания молодым писателям.
.
Нёбдінса Виттор
ПОЖЕЛАНИЯ МОЛОДЫМ ПИСАТЕЛЯМ
С одной стороны, многие считают: писатель уже рождается с писательским талантом, затем растет и вырастает в большого писателя, знаменитого поэта.
С другой стороны, слышал такие разговоры: писать – легко, если знаешь небольшую грамоту и умеешь излагать свои мысли на листе – уже можешь стать писателем.
Нужно сказать, оба мнения не верны. Ни один человек не рождается писателем. Писательское дело очень тяжелое, имея небольшие знания, писателем стать тяжело.
Чтобы стать писателем, нужно хорошо знать грамматику да литературный язык, быть в курсе нынешней жизни, условий, политики. Советским, пролетарским писателям нужно знать о классовой борьбе, об обучении марксизму-ленинизму, о направлениях деятельности коммунистической партии. Если это знаешь плохо, то не сможешь стать хорошим советским писателем. Конечно, нужно читать (изучать) старых и нынешних классиков и хорошие литературные руководства.
Чтобы стать писателем, нужно работать над самим собой – работать усердно, упорно, трудолюбиво.
Художественная литература, над чем работает писатель, – это не просто серое произведение, а хорошо проработанное, отредактированное, подправленное произведение, оно должно быть ярким не только внешне, но и внутренне – ведь это сердце, мозг произведения.
Художественная коми литература появилась после Октябрьской революции. До этого у коми не было даже письменности. Поэтому можно сказать, что коми литература еще очень молодая. Но коми литература у нас уже есть, и хорошо развивается. Коми писатели вновь появляются среди рабочих. Вот передо мной лежит большая кипа бумаг, все это – работы молодых коми писателей, – молодыми мы считаем не по возрасту, а начинающих писателей. Большинство произведений – стихи. Нужно сказать заранее: написать стихотворение гораздо сложнее рассказа (прозы). А большинство молодых писателей начинает именно со стихов. Для стихотворения нужен размер, такт и рифма, и с художественной точки зрения он должен быть краше прозы, более слаженной, короче, острее. У молодых коми писателей этих качеств в стихах как раз и нет. Поэтому и стихи получаются слабые, похожие на прозу, только написаны как стихи. Это самый главный недостаток. Во-вторых, до сих пор тематикой (основой) произведений большинства писателей является борьба за свободу при Октябрьской революции, освобождение угнетенных или наша победа во время гражданской войны. Конечно, эти темы всегда актуальны, но ведь пора уже обратиться к теме строительства, – здесь, к счастью, можно найти столько тем для произведения! Кроме того, видно, что у молодых писателей не хватает не то что политического, но и простого (элементарного) знания, в особенности хромает коми грамматика.
Писательство – очень сложное ремесло, сразу никак не получится хорошее, качественное произведение. Над этим нужно работать постоянно, расширять свой кругозор и улучшать технику письма. Этими пожеланиями я не хочу высмеять молодых писателей, их первые произведения, хочу лишь озвучить направления для их дальнейшей работы. Если у тебя есть желание, если тебя тянет к писательству, – не бросай это дело, а стремись писать дальше и пиши рабочим знакомым им языком, понятным для них. А если бывают ошибки – старайся их в дальнейшем исправить. К примеру, взять меня: я не писал до тридцати лет; когда начал писать – сколько ошибок получалось! Сейчас, спустя пятнадцать лет, сам вижу свои ошибки, да и сейчас, бывает, запинаюсь, но я не бросаю свой труд – пишу, как могу, стараюсь улучшать свои произведения и внешне, и внутренне. Только в одном я не изменился – я пишу понятным для коми трудового народа языком.
Сейчас посмотрим произведения, у кого что получилось.
- СТИХИ
Вот товарищ Югов (учитель из Лопыдина) написал стихотворение „Капитал кулас“ (Умрет капитал). Как вы думаете, умрет капитал? (...)
Конечно, это написано о заграничном капитале, только вот получилось его очень легко убить: „пирлы да баллы свинечӧн тупкыны вом“ (?) (пиру и балу свинцом закрыть рот). Мы знаем, капитал охватил кризис, но капитал еще силен, топором или лопатой или ножом его не одолеть, нужно другое оружие, в первую очередь – объединение пролетариата.
Возьмем стихотворение М. Героя (из Пажги) „ХV во“ (ХV год). Здесь он рассказывает о первой гражданской войне, затем переходит к нынешней стройке. Только нужно сказать, у Героя получился безалаберный подбор слов.
(...) Здесь нет никакой художественной составляющей, ни знания политики. Скажем: красный флаг у нас поднимался намного раньше, а не спустя три года борьбы; рабочий класс по все земле пристально следит за угрозой капиталистов, если бы не это, капиталисты давно бы напали на СССР. Кроме того, рифмы поставлены как попало (…).
Видно, что стихотворение написано мгновенно, в спешке, нигде нет никаких знаков (ни запятых, ни точек), даже некоторые слова записаны не до конца. Так художественное произведение, тем более стихотворение, писать нельзя. Другое стихотворения Героя «Сиа Гаврил Иванлы» (Посвящаю Ивану Гавриловичу) (герой-ударник лесного фронта). Он немного лучше предыдущего стихотворения (...)
Поэтому можно полагать: если М. Герой будет стараться, то из него сможет получится писатель.
А вот у Луз Ваня (учится в пединституте) стихотворение „Октябрлы 15 во тырӧм кузьта“ (К 15-летию Октября) получилось еще слабее (...)
Это „стихотворение“ нельзя даже назвать художественной прозой, это просто статья. Такие же и другие стихи у Луз Ваня: „Ыджыд вынӧн – ыджыд шагӧн“ (С большой силой — большими шагами) да „Сьӧдмӧма видз“.
(...)
Я специально не правил его произведения (как сам написал — так и показываю). Видно, Луз Вань грамматикой владеет мало. Никакой техники письма нет: нет ни размера, ни ритма, ни рифмы, а самое плохое — слабое содержание и нет ни капли художественности.
Не отличается от простой скороговорки или статьи два стиха Вась Педӧра (Федор Васильевич): «Кымӧр бӧрын» (После тучи) да «Тыртам мӧд вит вося план» (Выполним план на следующую пятилетку). В одном написано символикой о жизни после гражданской войны; второе стихотворение он хотел написать как ораторий. Только вот ни то, ни другое не получились.
(...)
Писателям не нужно увлекаться сложными конструкциями, нужно писать известными и понятными словами. Ведь художественная ценность не в сложных конструкциях, а наоборот – в красивых словах, в народных образах. Вот почему-то такую ценность как фольклор мы оставляем в стороне и ищем какие-то непонятные коми слова или русские слова. Очень поверхностно показываем свое развитие. Поэтому произведение получается очень схематичное, сухое, общее.
Если посмотреть стихи Вась Поля: „Оз пемды“ (Не темнеет), „Выль гӧрд знамя“ (Новое красное знамя) да „Сё дявӧла-беса“ (Со ста дьяволами-бесами). Также одни скороговорки.
(...)
Конечно такая „поэзия“ никому не будет по душе, никто ее не запомнит.
Василь Ёгор из Гривы – „Жоржик“ (на учебном курсе в ВУЗ) отправил 5 стихов. Только все тоже общие, одни пустые слова, а художественности и содержания нет. В стихотворении „Октябр“ (Октябрь) пять куплетов об одном и том же (…). И каждый куплет заканчивается ответом – „Октябр“. Можно было одним куплетом все и сказать. Или другое стихотворение – „Мед тӧдасны“ (Пусть знают). Он призывает комсомольцев быть готовыми, если вдруг на нас нападут враги (...)
Ёгор Семӧ так же пишет без образов, без какой-либо художественности, получился простой набор слов. Нет никакого содержания (...)
Другое стихотворение „Ёрт, кылан!“ (Друг, слышишь). (...)
Конечно, ни о какой поэзии здесь речи просто нет, и на рассказ не похоже, – подходит для слабенькой статьи. Еще одно стихотворение у Ёгор Семӧ „Армияӧ муна“ (Иду в армию), у которой тема, вроде бы, о нынешней работе, только написано очень слабо, нет никакой художественности, ни техники.
Похожи на статью стихи таких молодых писателей как у Прокӧ Вася „Тракторлӧн гӧрӧм“ (Вспасшка трактора) и „Кутшӧма выль олӧм паськалӧ“ (Как новая жизнь прогрессирует), у К. Карманова „Арся кылӧмъяс“ (Осенние эмоции), у Емва пи (А. Злобина) „Гажтӧм висьӧм“ (Грустная болезнь) и “Тыртам план“ (Выполним план), у Налимова Опонь Вася „Ми стрӧитам“ (Мы строим), „Вӧрзьывтӧм из“ (Неподвижный камень) и „Арын“ (Осенью). Опонь Вась стихотворением „Вӧрзьывтӧм из“ хотел подражать Выль Пашу (...)
Только у него ничего не получилось. Стихом „Арын“ хотел подражать моему произведению „Арся мойдкыв“ (Осенняя сказка), но тоже не срослось.
(...)
Еще есть стихи похожие на статью у Н. Мартюшёва „Мӧс лысьтӧм“ (Дойка коровы), И. Панюкова (из Дона) „Миян олӧм“ (Наша жизнь), у Мить Ӧльӧ „Кык кулак“ (Два кулака) (очень слабое содержание, как простая „басня“), у Герка „Колхознӧй му вылӧ“ (На колхозное поле), у Ан. Ал. Тим.-а „Воддза олӧм“ (Прошлая жизнь).
Довольно длинное стихотворение написал А. Размыслов - „Ягса музыка“ (Музыка соснового бора). Где-то получилось очень даже неплохо (...)
А в целом — все очень сильно перемешано (...)
Товарищу Размыслову нужно еще поработать над техникой письма. У него есть писательские способности. Чувствуется художественность и образность стихов.
Всего было рассмотрено 35 стихов 17 писателей.
Этим мы закончим разговор о стихах. Какой же вывод получается? Во-первых, со стороны тематики (о чем писать) – молодые писатели пишут очень пространственно, не берут известные им темы из нынешней жизни, работы; во-вторых, очень низкая грамотность (и общая, и политическая); в-третьих, с художественной стороны стихи очень слабые, не используются образы, разговорная речь; в-четвертых, очень низкая техника письма. На эти четыре момента нужно больше всего обратить внимание молодым коми писателям при написании стихов. Я считаю, после этих пожеланий молодые коми писатели не бросят свой труд, а усерднее возьмутся за творчество.
- РАССКАЗЫ
Художественная проза (очерк, рассказ, повесть, роман) занимает в литературе главное место. В нашей коми литературе до сих плохо развита художественная проза, больших рассказов (повестей) очень мало, а романов и вовсе нет. Художественный рассказ – короткое произведение об одном событии с легко понятной фабулой (сюжетом). Рассказ отличается от стихотворения больше всего формой и структурой. В рассказе тоже есть художественность, как и в стихотворении, но в рассказе у писателя больше свободы – может расширить сюжет, не нужны ни размер, ни рифма. Кроме того, в рассказе присутствуют три элемента: завязка, развитие действия и развязка. Чтобы рассказ и в начале, и в завершении держался одной темы, нужен сюжет – нельзя написать рассказ без сюжета, это будет очерк, или ничего не получится (только слова).
Еще нужно отметить: в каждом художественном произведении (будь то проза или поэзия) нужно отражать особенности современной жизни, направления деятельности пролетариата – художественная литература не может быть неклассовой.
Сейчас посмотрим и обсудим рассказы, направленные в журнал „Ударник“. Всего четыре рассказа, все небольшие.
Вот Казаков написал воспоминания „1919 воын Октябр праздникъяс лунӧ“ (В 1919 году в день празднования Октября). Рассказывается, как в Корткеросе (большое село в Сыктывдинском районе, от Сыктывкара 49 км) вечером со страхом ожидали белых из города. В полночь звенят колокола в церкви, народ всполошился, мечется по улице, в исполкоме дела в печке жгут, портрет Ленин заменяют одноглазой иконой, поднимают белый флаг; чуть ли не идут к мельнице навстречу белым со спасом на шесте. Вроде, начало у Казакова написано хорошо – с легким юмором и иронией, потом он отошел от своего стиля и закончил простой статьей. Только этот рассказ недостоверный: 6 ноября 1919 года в окрестностях Корткероса (ни Сыктывкара) белых не было, они стояли в Усть-Выми. Кроме того коммунисты – 18 человек – почему не смогли усмирить панику среди народа? Почему не прекратили звенеть и „менять“ исполком? Мы знаем, когда приходили белые, много курьёзов получалось. Нужно было об этом и писать (раз товарищу Казакову хотелось показать именно Корткеросскую потеху). Только его нельзя назвать полноценным рассказом, это воспоминание (как очерк), как отметил и сам писатель.
О приходе белых есть еще два рассказа: С. Вани из Айкино – „Белӧйдырся (в)олӧм“ (Жизнь во время белых) и М. И. Тарабукина из Керчомъи – „Керчомъяын 1917–18 воясын олӧм“ (Жизнь в Керчомъе в 1917-18 годах). Оба рассказа (воспоминания) – как жидкие статьи, ни сколько не откорректированные, если сказать – сырой (или сухой) материал, нет никакой фабулы, ни художественности, ни интереса, ничего нет, простая серая писанина.
Габ Як Микулай (из Сыктывкара) написал юмористический рассказ „Ясли“. Кому написал такой рассказ? По-моему, не советскому читателю, а мелкобуржуазным, мещанским жителям. (...)
Габ Як Микулай высмеивает и вульгаризирует большое достижение страны Советов – дошкольное учреждение, чего нет во всем мире, чего никогда не было в истории народа! Кому выгоден такой гнилой рассказ? Конечно, не нам! Не нужно такое рабочему народу.
Еще один рассказ есть у Сотчӧм Ваня – „Павел“. Этот рассказ очень простой, уже заранее знаешь, чем закончится, нет никакой интриги, ни борьбы: Павел возвращается домой из Красной Армии. Их хозяйство принадлежит колхозу. Им управляет кулак – старается развалить колхоз, вредит, транжирит деньги. Павел со свое невестой возьмутся и выгонят кулака из колхоза, а руководителем выберут Павла. Ничего эдакого здесь нет, простой рассказ, с художественной и сюжетной стороны слабенький, очень схематический.
- ПЬЕСЫ
Меньше всего в коми художественной литературе драматургии (пьес). Его, по сравнению с рассказом, написать сложнее всего, поэтому и пишут мало. Главное в пьесе – показать борьбу живых людей (через артистов) с кем-то и из-за чего-то. Здесь уже каждый участник показывает отдельный тип, человека с определенным характером или целую группу – характер и другие качества. В пьесе нужна динамика, меньше разговора, разного рода интриги, разное развитие сюжета. Пьеса интересна тогда, когда зритель (или читатель) до конца не знает, чем закончится действо (развязку), когда они думают так, а получается совсем иначе. Драматургу нужно быть мастером, чтобы написать хорошую пьесу. Я на такую работу, можно сказать, потратил большее количество своего писательского времени, поэтому немного знаю об этом – эта форма работы очень сложная! Много раз не получалось, приходилось начинать снова. „Моль“ писал четыре раза, и то хорошо не получилось, а „Рытъя“ (Вечерняя) получилась кулацкой пьесой. Вот ведь какая эта работа!
Сейчас посмотрим пьесы молодых писателей. Одну пьесу „Важ олӧм“ (Старая жизнь) написал какой-то Чаланов М., – видно, малограмотный писатель: пишет как курица лапой, ни одно слово не написал правильно, да и пьеса – какое-то баловство, шутка, детский юмор. Пьеса состоит из 3 частей, участвует 7 человек: муж и жена из крестьян, их сын и дочь, белый офицер и два солдата. Дело происходит в 1921 году (когда уже никаких белых не было). (...)
Другая пьеса Ив. Козлова – „Чорыдджыка винтовкатӧ кут“ (Крепче держи винтовку) состоит из одной части. Участвует 5 человек: пограничник Гриша (красноармеец), девушка Катя (из колхоза), дед (рыбак) и два шпиона (офицер и унтер). Действие происходит у границы. (...) Пьеса получилась слишком схематической и идеалистической. Лучше всего получился тип деда, который все время говорит Грише: „Чорыдджыка винтовкатӧ кут“ (Крепче винтовку держи). Но ведь говорить просто слова – это еще не дела делать. Поэтому эта пьеса и слаба.
О написании пьес придется написать отдельные пожелания, в одной статье все не отметишь.
На сегодня закончу. Молодым писателям еще нужно многому научиться, поставить перед собой более высокие требования.
Старательно обучаясь, усердно трудясь, товарищи писатели, создадим с национальной формой социалистическую художественную коми литературу.
Нёбдінса Виттор
Перевод Александры Паршуковой
