Небдiнса Виттор – коми йöзöс гажöдысь, том гижысьясöс велöдысь
Небдiнса Виттор – коми йöзöс гажöдысь, том гижысьясöс велöдысь.
Зэв на лöсьыда тöда кольöм пöраяссö, кодыр Небдiнса Витторлöн миян сиктъясö локтiсны первойя гижöдъясыс ворсанторъяс: „Гудрасьöм“, „Шондi петiгöн дзоридз косьмис“ да мукöд; сьыланторъяс: „Югыд кодзув“, „Мича нывъяс“, „Чужи-быдми сьöд вöр шöрын“, „Меда“ да сiдз водзö.
Тайö гажöдчанторъяснас Виттор медвойдöр заводитic коми сиктъясын йöзсö, медся ёна том йöзöс, гажöдны, медвойдöр босьтчис коми йöз костö паськöдны коми гажсö.
Майбырöй, спектакльястö комсомолечьяс пондicны пуктавны комиöн, сьывны коми сьыланкывъяс йöз водзас сi гудöк бöрся. Кывзiгад эськö том йöзтöгыд оз нин кольлы, дай пöрысь дядьöяс да тьöткаяс вомъяссö юмрöдлöны да нимкодясьöны, кывзöны. Гöгöрвоана ворсöм, сьылöмтö кывзасны да кодлöн вомкаличьясыс шпыньялöны, а мукöдсö и норыс на босьтлас.
Обложка сборника коми поэтов "Гöрд пöлан" (Красная дудочка), 1921 год. Сюда вошло несколько стихотворений Савина
Из книги: Виктор Савин в портретах, иллюстрациях, документах / сост. Т. И. Гуляев. - Сыктывкар : Коми книжное издательство, 1988. - 128 с. : ил.
Тайö первойя коми гажöдчанторъяс сиктас воöмсяньыс öнöдз пыр на коми йöз сьылöны Витторлысь лöсьöдöм сьыланкывъяссö. Сьылöны пöрысь дядьöяс, тьöткаяс, зонъяс, нывъяс, челядь – ставныс.
Эз, дерт, ещö пукты Витторыд ассьыс вынсö дас вонад. Кöть öд миян коми литератураыд зэв на том, а Витторыд первой йöзöдысь петiс. Октябрса революцияыд кыпöдiс Витторöс, дай уна мукöд коми гижысьöс, сетic ыджыд вöля да паськыд туйяс кывйöн культура кыпöдны.
Эз на первойя гажöдчöмнас помась Витторлöн коми йöзтö гажöдöмыд. Вочасöн петöны и öнi сиктъясын ворсанторъяс да сьыланторъяс: „Райын“, „Инасьтöм лов“, „ Ва шыр“, „Тувсов вой“ да мукöдтор.
Коми йöзыд эськö Небдiнса Витторöс нимнас да карточка вылысь чужöмбансö быдöн тöдöны, сöмын ассьö уналы на эз удайтчыв аддзыны.
Межадор гöгöр сиктъясса коми войтырлы удайтчылic и ассьö аддзывны да сылысь гöлöссö кывлыны.
М. Горький среди делегатов первого Всероссийского съезда крестьянских писателей. В правом верхнем углу - делегат от коми писателей В. А. Савин
Из книги: Виктор Савин в портретах, иллюстрациях, документах / сост. Т. И. Гуляев. - Сыктывкар : Коми книжное издательство, 1988. - 128 с. : ил.
1925-öд воын, кодыр Коми муö волiс гидроплан, сэки Небдiнса Виттор гидроплан вылас волiс Сыктыв вожö. Межадор улö пуксисны да мыйöн кывлicны Небдiнса Виттортö, быдöн ас костаныс кутiсны шöпкöдны: „Коми песняяс лöсьöдлысь Витторыд пö локтöма“. Виттор сэки висьталыштiс комиöн гидроплан ветлöм йылысь да бöрас коми войтыр ас костаныс сернитöны: „Дзик жö пö тай миян кодь коми морт вöлöма, кутшöм мичаа да небыдика коминас сернитö“. Уналы вöлi любö Витторлöн воöмыс.
Виттор абу сöмын коми йöзöс гажöдысь. Сiйö и миянöс велöдысь. Сiйö кутiс чипсасьны, сьывны да тшöтш мукöдъяс отсасьны кутicны, кыдзи тай пармаын сьöла заводитас чипсасьны, сы дiнö локтасны нöшта сьöлаяс да тшöтш пондасны чипсасьны, сьывны.
Коми му пасьталаас öнi зэв нин уна гижны радейтысьыс, велöдчысьыс. Газетад да журналад гижöдыд вель уна нин локтö. Найö костысь петöны тöдчана том гижысьяс, сьöлöмсяньыс гижöдсö радейтысьяс, ассьыныс сьöлöмсö гижöдыслы сетысьяс, коми йöз пöвсö выль гажöдчöм паськöдысьяс. Виттор миянöс – том гижысьясöс, ассьö вежысьясöс, пыр на велöдic, туйдöдiс, сюсьмöдiс.
Ми – том гижысьяс Витторлы аслас юбилей лунö ыстам ыджыд чолöм да надейтчам, Виттор водзö на пондас гажöдны коми войтырсö да велöдны миянöс енджыка.
Ми нöшта жö сьöлöмсяньджык босьтчамöй коми литературасö йöз костас паськöдны.
Чолöм коми гижысьлы!
Кон Öль
.
Куликов, А. А. Небдiнса Виттор – коми йöзöс гажöдысь, том гижысьясöс велöдысь / Кон Öль // Югыд туй. – 1928. – 22 нояб. – Пер. загл.: Виктор Савин – вдохновитель коми народа, наставник молодых писателей. – Подписано псевд.: Кон Öль.
