Небдiнса Витторöс ыджыдалан рыт

Небдiнса Витторöс ыджыдалан рыт.

Сыктывдiн карса мöд ступöня школа тшем тыр коми войтырöн ­– морт 500 саяс локтiс Небдiнса Витторöс ыдждöдлан рыт вылö. Йöз пытшкын тыдалöны тшöтш тошка дядьöяс, пöрысь нывбабаяс. Быдöн серамбанаöсь, шпыньялöны, нимкодясьöны, радлöны.

– Талун миян бур коми гижысьлы, Виктор Öльöксьöйöвич Савинлы (Небдiнса Витторлы), тырö 40 арöс. Дас во чöж сiйö аслас мича гижöдъясöн да сьылöмöн гажöдiс коми йöзöс, отсалiс гижöд пыр налы: водзджык – вермасьны еджыдъяскöд, сэсся – дорны выль олöм, – торжественнöй заседанньö восьтiгöн шуö Минин ерт. – Ми сиам Небдiнса Витторлы уна во на гажöдны коми йöзöс, отсавны налы, петны сьöд, пемыд пармаысь паськыд да шыльыд туй вылö, кодi вайöдас войтырöс социализмö, – помалiс ассьыс висьталöмсö Минин ерт. Сылысь бöръя кывъяссö тупкис музыкалöн ворсöм.

Виктор Савин. Рисунок П. Семячкова

Сцена вылö кайис Витторлöн мамыс, сэсся ачыс Витторыс тыдовтчис. Чорыд гымöн юроптiс зал кузяыс киясöн вачкöдöм, дугдыштлас да, бара сыысь чорыда юргыны кутас залын.

Попов ерт вöчис доклад: „Коми художествоа литература да Небдiнса Виттор йылысь“. Сы бöрын, Виттор Öльöксьöйöвичöс ыдждöдлöм кузя, висьталicны представительяс: Обкомсянь, Обисполкомсянь, Обпрофсоветсянь, Кöдзвывса крестьянасянь да мукöд.

Небдiнса Виттор вочакывйöн ыджыд аттьö видзис сiйöс ыдждöдлöмысь да лыддьыс вочакывъя коми стик (стиксö видзöд „Коми сикт“ газетысь, 48 номерысь). Обисполкомсянь, Обпрофсоветсянь да мукöдласянь, Виттор Öльöксьöйöвичлы сетicны гöснечьяс. Музыка ворсö туш. Залын кийöн вачкöдöм пырсяыс нинöм оз кыв. Сэсся лои спектакль. Пуктicны Небдiнса Витторлысь гижöм 3 торъя ворсантор „Вабергач“. Сы бöрын вöлiсны сьылöм-лыддьöмъяс. Рытыс зэв гажаа мунiс.

Выль Паш

.

Шеболкин, П. Небдiнса Витторöс ыджыдалан рыт / Выль Паш // Югыд туй. – 1928. – 25 нояб. – Пер. загл.: Юбилейный вечер Виктора Савина. – Подписано под псевд.: Выль Паш.