Нёбдінса Витторлöн пьеса „Рытъя“ – веськыдвыв кежысьяслöн пьеса
И Оботуров.
Нёбдінса Витторлöн пьеса „Рытъя“ – веськыдвыв кежысьяслöн пьеса
Колхозъяс тэчöм йылысь да сійö подвылын кулакъясöс, кыдзи классöс, бырöдöм йылысь öткымын коми гижысьяс пырöдчисны торъя гижöдъясöн.
Колхозъяс тэчöм йылысь – тема зэв ыджыд и позьö, да и колö, джуджыдджыка (пыдӧджыка) сы йылысь гижны. Сиктъясын заводитчысис вужсяньыс сиктса олöмсö пазöдысь революция. Паськалö колхозъяс тэчöм гöгöр чорыд кось. Кулакъяс став вынсö, став ассьыныс мöвпсö пуктöны, медым падмöдны колхозъяс тэчöм. Шöркоддьöм крестьяна кутісны ыджыд массаöн пырны колхозъясö. Сиктын вöчсьö немнас вöвлытöм ыджыдтор, нимыс сылöн – социализм.
Коми гижысьяс оз вермыны кольны бокын колхозъяс тэчöмын. Быд коми гижысьлы колö кутчысьны гижны колхоз тэчöм йылысь. Мед быд гижысь бöръяс, кутшöм формаöн бурджык петкöдлыны тайö ыджыд эпохасö. Оз позь шуны, мый колö гижны, шуам, сöмын драмаяс. Колö гижны быдсяма форманас, гижысь аслас вын серти, мöвп серти должен формасö ачыс бöрйыны. Медважнöйторйыс тані лоö не форма, а пытшкöсса гижöмыс, содержанньöыс. Содержанньöыс кö лоö омöль, торксяс и формаыс, кöть кутшöм бура, мичаа эз вöв эськö сійö гижöма.
Содержанньö боксяньыс коми пролетариат нога критикалы и колö видзöдлыны быд произведение вылö. Марксизм миянöс велöдö, мый содержанньöлы подчиняйтчö формаыс. И тайö тезисыс уна раз нин вöлі прöверитöма практика вылын и лоö вензитöм (бесспорным) тезисöн.
Колхозъяс тэчöм йылысь коми художествоа быд кыв имеитö зэв ыджыд значенньö. Колхозъяс тэчöм – öнія дум быд гöль да шöркоддьöм крестьянинлöн.
Колхозъяс йылысь быд кыв зэв чорыда öні инмö быд юрö. Колхозъяс тэчöм абу абстракция, сійö быдлунъя практика. Колхозъяс тэчöмын, кыдзи и быд выльторйын, эм зэв уна нелючкияс. Быд колхозник, быд сиктса уджалысь думайтö, кыдзи эськö омöльторъяссö, нелючкияссö, „шуйгавыв“ кусыньяссö бырöдны. Сы понда коми художествоа кыв вылö, колхозъяс йылысь гижöдъяс вылö – усьö зэв ыджыд ответственность. Быд гижöдын колö нуöдны кежлытöг, правильнöй, Ленин установка. Тайö ответственностьсö колö чувствуйтны став гижысьяслы, кодъяс кöсйöны не прöста мыйкö гижны, а збыльысь отсавны ёнмöдны колхозъяссö, мыччöдлыны колхозъяслысь югыд туйсö.
Нёбдінса Виттор правильнö вöчис, мый медводдза гижысьяскöд öтшöтш гижис пьеса „Рытъя“, водевиль формаа. Ми огö кутöй тайö гижöдсö чорыда видлавны форма боксянь. Сійö коркö позяс видлыны мöд здук. Колö видзöдлыны „Рытъя“ вылö медводз содержанньö, установка боксяньыс. Колö видзöдлыны, колхозъяс тэчöмсö тайö водзö йöткас, либö торкас.
Колö веськыда шуны, Нёбдінса Виттор аслас задачаöн эз справиты. „Рытъя“ – пьеса лои вывті ладтöм, неудачнöй. „Рытъя“ пьеса нуöдö идеологиясö веськыдвыв кежысьяслысь.
Нёбдінса Виттор теш формаöн петкöдлö „Рытъя“-ын öнія кулакъяслысь да попъяслысь наступленньöяссö, олöмсö. Кыдзи сійö петкöдлö?
Нёбдінса Витторлöн кулак бöрдö:
„Шонді банöй олöмöй да
Важ олöмöй, важ гажöй.
Важ олöмöй, важ гажöй да,
Кулак кад коллялöмöй…
…Миян олöм дзугсьöма да!
Пöследньöй кад колльöмöй!“.
Кулак бöрдö! Öнія кадöдз быд сиктса уджалысь, быд гöль да шöркоддьöма крестьянин, колхозник эз на аддзыв бöрдысь кулакöс. Кулак кö бöрдö, значит сійö асьсö лыддьö вынтöмöн нин, сійö миритчö нин сöвет власьт политикаöн. И збыльысь пьеса помын кулакъяс да попъяс пывсьöны пывсянын и ассьыныс кулак да поп няйтсö, Нёбдінса Виттор серти, вуштöны, мед став дукыс мынас и найöлы позяс пырны колхозö. Вот другö кутшöм артмö идиллия, Нёбдінса Виттор серти! Кулакъяс да попъяс признайтöны ассьыныс лёк олöмсö, чöвтчöны сыысь, мунöны пывсьыны мед няйтыс мынас, и став сьöлöмнас радлöны пырны колхозö, да нöшта не кутшöмкö тöвариществоö, а веськыда коммунаö!
Лыддьысь, видзöдысь водзö сувтö не сэтшöм кулак, кутшöм сійö эм олöмас, кутшöмöс ёрд вылö петкöдлöны суд да прокуратура. Лыддьысь, либö видзöдысь вермас дивуйтчыны Нёбдінса Витторлысь „Рытъя“ видзöдöм бöрын: „Со тай кулакыд раммöма, вöзйысьö колхозö! Вöлöмкö коммунист партия, ни Молотов ёрт абу правöсь, кор найö шуöны: „кулак öнія кадö медлёк враг“.
Бöръя картинаас кулак да поп пывсьысьяслы эськö комсомолечьяс и шуöны: „кöть сэсся мыссьöй, сёровно колхозад огö босьтöй“. Сöмын тайö кывъясыс ньöти абу убедительнöй. Кулак кö раммис да не сöмын раммис! Кулакъяс да попъяс признайтісны, сідзи петкöдлö Нёбдінса Виттор, ассьыныс лёк уджсö и кöсйöны пырны коммунаö, кулак кö абу нин лютöй враг, мыйла сійöс оз позь збыльысь босьтны колхозö? Татшöм вопрос сетö аслыс видзöдысь. И видзöдысьлы Нёбдінса Витторлöн немтор öтветитны. Немтор öтветитны сы понда, мый став сюрöсыс „Рытъялöн“ кулакъясöс петкöдлö не олöм серти.
Нёбдінса Витторлы, сідзжö и мукöд гижысьяслы, колö чорыда тöдны: „Коді – кодöс?“ (Кто – кого?) – тайö вопросыс олöмсьыс эз на быр. Сиктын мунö ён кось социализм да капитализм элементъяс костын. Социализма элементъяс сиктса олöмын быд шаг босьтöны бойöн кулаккӧд. Молотов и сідзжӧ став коммунист партия правӧсь, мый кулак ӧнія кадӧ, медлёк, медлютӧй враг. И абу правӧсь веськыдвыв кежысьяс, кодъяс шуӧны: „кулак врастает в социализм“.
Раммӧм, миритчӧм кулакӧс, ассьыс няйтсӧ вуштысь попӧс вермас аддзыны сӧмын веськыдвыв кежысь, либӧ обыватель, коді колхозъяс вöчӧмын сулалӧ бокын и колхоз тэчан бипуръяс эз сюрлы. Сы понда „Рытъя“ пьеса сетӧ видзöдысьлы, лыддьысьлы, партиялы паныда установка кулак йылысь.
Быд коми гижысьлы, сідзжӧ дерт и Нёбдінса Витторлы, колі мыччӧдлыны не раммӧм кулакӧс да попӧс, а сэтшӧм, кутшӧм эм олӧмын – лютӧй врагӧс. Коді лыддьӧ газетъяс, сійӧ тӧдӧ, мый Мылдінын кулак пуртсӧ воропӧдзыс сюйис гӧль крестьянинлы морӧсас. Проньдорын кулакъяс шулісны: быд колхозник сулалӧ сӧмын 25 ур, пуля дон. Керчомьяса кулакъяс лӧгсӧ пыдӧ сюйӧмаӧсь, виччысьӧны переворот. Кебраса кулакъяс грӧзитчӧны вины колхозникъясӧс.
Татшӧм фактъяссӧ позьӧ коми олӧмысь босьтны мыйта колӧ. Мыччӧдлӧны-ӧ найӧ, мый коми кулак раммис да мунӧ пывсянӧ вуштыны кулак няйтсӧ? Коді шуӧ – кулак раммис, сійӧ личӧдӧ гӧль да шöркоддьöма крестьяналысь вынсӧ кулакъяскӧд тышкасьӧ вылӧ, сійӧ нуӧдӧ визьсӧ веськыдвыв кежысьяслысь.
Национал-шовинизма политика воддза партийнӧй рукӧводстволӧн сійӧн и вӧлі петкӧдлӧма ёрд вылӧ, мый сиктъясын эз вӧв котыртӧма батракъясӧс да гӧль крестьянаӧс кулакъяслы паныд. Национал-шовинистъяс, правда, эз шуны, мый коми кулак раммис, сы понда оз ков котыртны гöль крестьянаöс. Национал-шовинистъяс эз лыддьыны коми кулакöс серьёзнöй паныда вынöн. Сы понда наö эз и зільны гöль крестьянаöс котыртны кулакъяслы паныд.
Нёбдінса Виттор мöд боксянь мыччöдлö кулакъяссö, а локтö öти выводö национал-шовинистъяскöд: кулак вынтöм, оз ков сыкöд косясьны.
Нёбдінса Витторлöн раммöм кулак. А кулак кö раммöма, кодлы жö паныд котыртны гöль крестьянаöс? Огö жö öд раммöм кулакъясöс рельсъяс вылö öшöдлöй?
Артмö сідзжö, кыдзи и национал-шовинистъяслöн: кулакъяслы паныд оз ков котыртны гӧль да шöркоддьöм крестьянаӧс.
Ме ог кöсйы шуны, мый Нёбдінса Виттор сознательнöя кöсйис личöдны тышсö кулакъяскӧд. Ме сідзи ог думайт, но объективнöя артмö, мый пьеса „Рытъя“ чуксалö видзöдысьöс, лыддьысьöс личöдны тышкасьӧмсö кулакъяскӧд. Сы понда „Рытъя“ пьеса öнія гижöдöн оз позь рекомендуйтны сиктсаяслы сувтöдны сцена вылын.
Кутшöм впечатленньö пьеса кольö видзöдысь вылö? КАПП-са шленъяс вöчисны торъя собранньö вылын оценка „Рытъя“ пьесалы. Став шленъяслöн лои сэтшöм мненньö: пьесаын петкöдлöм кулак вызывайтö видзöдысьсянь жаля настроенньö. Психология боксянь пьесалöн тайö медомöльтор. Если кö ми шуам, мый кулак медся лёк враг, то быд гижысьлы колö зільны кулакъясӧс петкöдны уджалысьяс водзын сідзи, мед эськö быд видзöдысьлöн, быд лыддьысьлöн вöлі желанньö – кулакöс талявны, кыдзи лёк гагöс, бур олöм дзугысьöс.
Медыджыд достоинствоыс пьесалöн и быд художествоа гижöдлöн сэк, кор сійö мобилизуйтö уджалысь йöзöс бырöдны кулакъясӧс, став капитализм элементъясöс. Тайöтор Нёбдінса Виттор пьесаын абу. Пьеса оз мобилизуйт уджалысь крестьянаӧс кулакъяслы паныд. Тайö медомöльтор пьесалöн содержание боксянь.
Коркö Плеханов гижліс: „Когда талантливый художник вдохновляется ошибочной идеей, тогда он портит свое собственное произведение“. Тайö кывъясыс зэв ёна инмö Нёбдінса Виттор „Рытъя“ пьесалы. Инмö сы понда мый Виттор босьтіс идеясö веськыдвыв кежысьяслысь, партиялы паныд идеяас.
Первое здание коми театра постройки 1932 года. Фото с сайта http://oldsyktyvkar.ru
Öшыбкаа идея, мый кулак раммöма и сьöлöмсянь локтö колхозö, тшыкöдіс став пьесасö дзикöдз. Форма боксяньыс абу омöль пьеса, лои туйтöм содержание боксянь.
Ми думайтам, мый Нёбдінса Виттор признайтас ассьыс оппортунизма öшыбкасö, выльпöв вежас сюрöссö пьесалысь, либö гижас дзик выль пьеса.
Ме ногöн „Рытъя“ пьесаын Савин попъясöс петкöдіс сідзжö не öнія олöмысь. И сідзжö абу вернö, мый попъяс чöвтчöны асланыс лёк уджысь и зільöны пырны колхозъясö. Думайтам, мый кодкö коми гижысьясысь, гашкö и ачыс Нёбдінса Виттор петкöдласны попъяслысь öнія типсö.
Чуксала ставöс, кодъяс видзöдлісны Сыктывкарса театрын пьеса „Рытъя“, гижны ассьыныс отзыв.
Оботуров И. Нёбдінса Витторлöн пьеса „Рытъя“ – веськыдвыв кежысьяслöн пьеса / И. Оботуров // Ордым. – 1930. – 9 №. – 25-27 л. б. – Пер. загл.: Пьеса Виктора Савина „Рытъя“ (Вечерняя) – пьеса правых оппортунистов.
