Небдiнса Витторлöн олöм-вылöмысь

Небдiнса Витторлöн олöм-вылöмысь.

Воддза олöмысь.

          Ас йывсьыс Небдiнса Виттор шуöма öти кывбурын тадзи:
         „Чужi, мыдми сьöд вöр шöрын,
         деревняысь петi,
         Новлi чорыд сера дöрöм,
         Визя гач да кöтi“.

Та серти нин позьö тöдны, кытысь петлöма миян коми гижысь Небдiнса Виттор. Сiйö чужлöма талунъя лунö 1888 воын гöлиник крестьянин семьяын, Трöш сиктын, Небдiн вöлöстьын, Кулöмдiн уездын. Мам-батьыслöн вöлöма сiйö медводдза пи да, быдмигас мед уна и уджыс сюрлöма сылы – кага видзöмсянь заводö пес керавны ветлöмöдз. Сизим арöс тыртöдз Виттор школаö велöдчыны пырöма – батьыс оз вöлöм кöсйы велöдныс да, бöрдöмöн вöлöм мунö школаас, ладнö сы понда ёна мамыс сылöн зiльöма-а. Первой велöдчöма Небдiнса „земскöй школаын“? Cэсся Дереваннöйса второкласснöй школаын. Бöръя школаас велöдчöма куим во, 1901-1904-öдз, помалöма „первой ученикöн“. Тайö и эм став велöдчöмыс Витторлöн, водзö велöдчыны сылы туйыс тупкöса вöлöма: гöль мам-батьыс эз вермыны водзö велöдчыны мöдöдныс (Дереваннöйса школаын велöдчöма казна тшöт вылö, бура велöдчöмыс кузя мам-батьыслысь абу босьтлöмаöсь донсö). Велöдчöмсö помалöм бöрын Виттор вöзйысьлöма учительö да местаыс абу лоöма. Ыстöдöны вöлöм морттö сэсся дяк ремеслöö велöдчыны, да ачыс абу мунöма. Кытчö сэсся воштысян вöлi важöнтö сиктса „велöдчöм“ мортыд? Видз-му уджавны да заводскöй чуркатö бергöдлыны оз вöлi ков ыджыд грамота.

Село Небдино. Фотография 1984 года
Из книги: Виктор Савин в портретах, иллюстрациях, документах / сост. Т. И. Гуляев. - Сыктывкар : Коми книжное издательство, 1988. - 128 с. : ил. 

Арнас 1904 воö (сентябрь 20 лунö) Виттор кайöма Кулöмдiнö да пырöма служба вылö 4-öд участокса земскöй начальник ордö (тайö местаас индöма сiйöс Дереваннöй школаса важ учительыс). Медводдзаысь сэки Виттор овмöдчöма ас кошта вылас. Жалованньöыс эськö абу на вывтi ыджыд вöлöма – 5 шайтöн тöлысь сöмын мынтылöма земскöйыд, да тырмылöма на и сiйö Витторыдлы. Висьтавлö тай сы йылысь ачыс: мынта пö вöлi патераысь сейöм-юöмöн да дöрöм гач песлалöмöн тшöтш ставсö 3 шайт тöлысьнас, а кык шайтыс пö кольö на вöлi аслым „на гулянье“. Сы бöрын сэсся Виттор вöвлöма Кулöмдiнса волостнöй пиарлы отсасьысьöн. А 1905 воын гожöмнас мунöма Печораö – первой Саваягö, сэсся Щугöрдiнö – волостнöй писарö. Сэнi олiгöн (öти во да тöлысь) Виттор и тöдмасьлöма медвойдöр на политика йылысь, овлöмаöсь сэки самöй сэнi политическöй ссыльнöйяс да.

Из книги: Виктор Савин в портретах, иллюстрациях, документах / сост. Т. И. Гуляев. - Сыктывкар : Коми книжное издательство, 1988. - 128 с. : ил. 

Печораысь Витторöс 1906 воын мам-батьыс корöмаöсь гортас – уджавны некодлы да. Сiйö арнас Витторöс кöсйылöмаöсь гöтравны Тиюк вылö. Сы йылысь ачыс вöлi мичаа гижöма кывбур „Тиюк“:

         „Тиюк авъя, Тиюк мича,
         Тиюк зiль мам-батьлöн,
         Cёшайт Öльöксеевичöй,
         Пыр миянö зятьöн“.

Дас кöкъямыс арöсöн сiйö мунлöма Богослов заводö, батьыскöд пес керавны. Уджалiг костiыс сэсся пышйöма куреньсьыс да веськалöма Рудникö (Богословсянь 15 километр), ыргöн руда перъян инö, контораын служитны. Сэнi служитiгас (1907-1911 воясö) Виттор и гöтрасьлöма 1908 воын гöлиник роч ныв вылö, сэнi жö призыватчылöма и (1910 воын): салдатö абу туйлöма да, ратникö гижлöмаöсь. Март тöлысьын 1911 воö Виттор мунöма Рудниксянь Украинаö. Сэнi служитлöма кöрт руда перъян инъясын (Кривой Рог гöгöрын) конторщикын.  Февральса да Октябрса революция бöрын, кор Украинасö босьтiсны гайдамакъяс да немечьяс (оккупация) да сэтчöс тöлысьын 1918 воö Виттор локтöма гортас – Коми муö. Ставсö дас кык во чöж сiйö ветлöма йöзын, бокын.

Дас вося общественнöй да гижан удж.

Гортас Витторлöн некутшöм вотчина нин абу вöлöма да, сiйö лэччöма Сыктывдiн карö служба-места корсьны. Пырöма Уездувса Чрезвычайнöй Комиссияö делопроизводительöн (август 1 лунö 1918 воö). Сентябрь 15-öд лунсянь сiйöс пуктöмаöсь УЧК секретарö. Октябр 24-öд лунö Виттор пырöма коммунист партияö, декабр тöлысьын I-я уездувса партконференция бöрын, Витторöс пуктöмаöсь вöлi УЧК, председательö, – сэнi олic 1919 вося февраль тöлысь помöдз (УЧК сэки ликвидируйтчис). Декабр 4-öд лунсянь, 1918 воын жö, Витторöс пуктicны тшöтш „Зырянская жизнь“ нима газетö редакторöн, – уджалic cэнi оръявлытöг 1925 вося декабр 15 лунöдз. Мартсянь юньöдз (1919 воын) Витторöс бöрйывлiсны уездувса исполкомö членöн. 1919 вося июнсянь 1920 вося октябрöдз вöлi уездувса парткомын секретарöн. Обласьтувса медводдза партконференция (январ 1921 во) бöрйылic обласьтувса парткомö членöн. Медъёнасö Виттор уджавлic бöръя вылас газетъясын да „Ордым“  журнал бердын. Татшöм Витторлöн сöветскöй, партийнöй да общественнöй дас вося уджыс (дженьыдика висьталöмöн).

Октябрса революцияöдз Виттор нинöм абу гижлöма комиöн. Гижны босьтчöма Сыктывдiн карö воöм мысти нин. Медводдза гижöдыс петалöма 1918 вося август тöлысьын „Зырянская жизнь“ газетын (18-öд №) – кывбур „Гöрд звöн“. Сэкисянь сiйö и босьтöма аслыс гижсян нимсö „Небдiнса Виттор“. Воддза кывбуръясыс сылöн абу зэв шыльыда артмывлöма. Сöмын регыдöн сiйö ассьыс гижöдъяссö вермис мичмöдны, шыльöдны-мольöдны – торъя нин бура ортсыла боксяньыс. Гижан ногыс и сямыс Небдiнса Витторлöн – прöстöй коми йöз сёрниа, быдöнлы гöгöрвоана, кокньыдик теш сора, лöсьыда рифмуйтöм кывбуръяс да сьыланкывъяс. Уна аслас кывбурлы сiйö лöсьöдöма сьыланногъяс (мелодии), – пöшти став выль коми сьыланкывъясыс Небдiнса Витторлöн лöсьöдлöм. Сьыланкывъясыс и сьыланногъясыс мичаöсь, йöзыслы тöдсаöсь да сьöлöм вылö воанаöсь, – сы вöсна и паськалicны (пырiсны) регыдöн коми йöз пытшкас. Небдiнса Виттор – революция бöрся медводдза пролетариат ногса коми гижысь. Став кывбурыс и мукöдпöлöс гижöдъясыс гижöдъясыс сылöн – коми йöзöс выль оласногö чуксалöм, лёк олöмсö серавлöм, мича гажöн йöзлысь сьöлöмъяссö кыпöдöм, паськыд выль туйö веськöдöм.

Кывбуръясысь да сьыланкывъясыс кындзи Небдiнса Виттор гижалiс бура уна коми пьесаяс, ёна зiлис кыпöдны коми йöзлысь культурасö театр пыр, дай коми театрсö сiйö медъёна кыпöдiс (öнi на ёна тöждысьö и). Медводдза пьесаясыс сылöн – „Корасьысь“ да „Гудрасьöм“, „Пуктылiгöн“ (кытчöкö вошöма), „Ыджыд мыж“, „Шондi петiгöн дзоридз косьмис“, „Вабергач“, „Райын“, „Тöдтöм туйöд“, „Водзöс“, „Путкыльтчöм“, „Черань“, „Нывбабаяс“, „Шондiлань“, „Тшын“, „Инасьтöм лов“, „Сырчик бöрся“, „Ныв грек шобöм“, „Секлетея-непочка“, „Ва шыр“, „Кулöмдiнса бунт“ да öтувъя сьылан висьталöм „Гора омра“. Медгырысьясыс тайöяс пиын „Тöдтöм туйöд“ да „Кулöмдiнса бунт“.

Небдiнса Виттор босьтчис уджавны буретш, кыдз – шусьö, революция пуан каднас. Кыдз мый вермис зiлис шымыртны олöмсö унджык боксянь öтпырйö. Сы вöсна сылöн эштöдтöм (помавтöм) коли кымынкö бур гижöд, шуам кöть: „Меда“, „Зырянизация“ (чайтам, тайö кывбуръяссö помалас на Виттор).

Öнi Небдiнса Виттор служитö ОБОНО-ын, сиктса художество удж нуöдысь инструкторын, дерт, гижан уджсьыс сiйö эз на эновтчы: гижö газетъясö да Ордым журналö, – редакцияас сiйö тшöтш редколлегияын. Сэсся гижö ыджыд (кузь) висьт „Тöв паныд“. КАПП-ö пырис сiйö котыртчан лунсяньыс (1926 вося март 12 лунö), Правлениеас членын.

. 

Нёбдiнса Витторлöн олöм-вылöмысь // Югыд туй. – 1928. – 22 нояб. – Пер. загл.: Из жизни Виктора Савина.