Водзпырся да öнiя дырся Виттор

Водзпырся да öнiя дырся Виттор

Ми кö серни кыпöдам Виттор йылысь, миян серниыс тшöтш пансьö коми художествоа литература йылысь. Мыйöн нö Витторыс сэтшöмасö коми литератураас тöдчö? Небдiнса Виттор – Октябрса революция бöрся первойя комиöн гижысь; аслас гажа гижöдъяснас коми йöзсö вермис гöгöрвоöдны коми литературалысь коланлунсö пыдди пуктыны, дай öзйöдны мукöдöс комиöн гижан удж вылö босьтчыны.Октябрса революция бöрын коми сьылан-ворсанторъясыд разавлiсны быд коми пельöсö; быдлаын сьывлiсны сьöлöм кыпöдана чуксасян сьыланкывъяс; ворсавлiсны выль нога долы долöмö ыштöдана ворсанторъяс. Пöрысьяс и томъяс шешъялiгтыр, шпыньялiгтыр дышмывтöг кывзiсны сэкдырся сьылöм-ворсöмъяс. Регыдöн гöгöрвоисны олöмыслысь жулльысьöмсö, важ сар дырсялысь пöрöмсö да рочмувывса эмбуртöмъяслысь, гöльяслысь лыбöмсö. Сэк кежлö Виттор, дай мукöд гижысьяс, сяммисны гижны олöмыслысь збыльсö: гажаа чуксасяна сьыланкывъяс да лек оласногсö серавлана ворсанторъяс. Сэки кö эськö кутiсны гижны нориник лирикатö, дерт эськö коми йöзыдлысь эз вермыны мöвпъяссö выль нога олöмлань лыбöдны дай коми литературалысь коланлунсö гöгöрвоöдны. Коми сиктыд сэки нин казялiс коми литературалысь коланлунсö, сöмын эз сiдзи, кутшöмкö ногöн сiйö öнi гöгöрвоö коми литературалысь коланлунсö.

Небдiнса Виттор сэкъясö тöдмöдiс асьсö гажа сьылан-ворсанторъяснас; нималiс быд пу увса пишщаля-понъя мортлы, быд горт гöгöрын видз-му бердса уджалысьлы.

Öнi оласногыд дзик нин мöд. Öнi сэкдырся нога сьылöм-ворсöмъяс вылад коми йöзыд жеба нин ыштö, а миян öд дай Витторлöн на гижöдъясным пыр на революция дырсяас кыскö. Медся нин енасö том гижысьяс сэтчö падмöмаöсь: сюрöссö босьтöны öнiа дырся олöмсьыс, а гижан формасö революция дырся гижысьяс вылысь. Сiдзöн найö шöрö вошöмаöсь. Кад нин коми гижысьяслы öнiя олöмсö вöтöдны! Öнi коми дядьöясыд радейтöны выль пöлöс (форманас и сюжетнас) сьылан-лыддянъяс кывзыштны, öнiя олöмсö петкöдлана гажа ворсанторъяс видзöдны. Небдiнса Виттор та боксянь омöльджыка на тöдчö. Та боксянь Витторлöн тöдчöмыс кажитчö йöзкостса творчествоыслы подражайтöда.

Водзпöр кö Небдiнса Виттор да мукöдъяс гажаа чуксасьлiсны важ оласногыслысь туйтöм мыльöссö, – мед жö и öнi пармаса войтырсö ызйöдасны кутчысьны выльнога öтласа уджас!

С. И.

 . 

Водзпырся да öнiя дырся Виттор / С. И. // Югыд туй. – 1928. – 22 нояб. – Пер. загл.: Вчерашний и сегодняшний Виктор.