Лыдди да мöвпала…
дженьдöдöмöн
Лыдди да мöвпала…
Ӧнöдз Н.-Виттор эз жö гижлы прозаöн. Ӧні со и 4-öд № „Ордымысь“ аддзам сылысь висьт – „Олöм туйвеж“. Бур, бур! Позьö эськö вöлі и войдöр казявны дзоляник „уклон“ проза бердö, сöмын öні, тыдалö, збыльысь кöсйысьö шыбöльтчыны прозалань. Ме думаысь, Витторлöн эмöсь кужöмъяс олöм петкöдлыны. Кокниа шмонитöмыс, колö чайтны, кутас ёна отсавны сылы бура гижны. Кутам витчысьны выль гижöдъяс. Ӧні кежлö видзöдлам „Олöм туйвеж“ вылö.
Тайö висьтыс, дзоньнас кö босьтны, колö шуны, том коми прозалы бур гижöдöн. Гижö зэв лöсьыд да бур коми кывйöн. Вывті нин бура тöдö сёрнисö нывбабаяслысь. Кöть эськö кöн сюрö Н.-Виттор „чотö“, сöмын он кö кут крукасьны посни нелючкиясö, колö индыны Витторлысь типъяссö петкöдлыны кужöм. Абу син водзсьыс воштöма и посни „визьяс“ коми олöмысь.
Уна коми морт öніöдз на радейтö кужтöг тшапитчыны роч кывйöн, Морт роч кывсö оз тöд, а кыськö кывлас кутшöмкö роч кыв да, пöшти быд кыв бöрын „лöсалö“ тайö роч кывнас. „Геройыс“ висьтас, вузасьысь Спира, помса, мый оз шу, ставсö помалö „беспöлезнö“ кывйöн, дерт, унджыкыссьö не местаö шуöмöн.
В. А. Савин (справа) и М. П. Ползунов в редакции газеты "Югыд туй". М. П. Ползунов - известный публицист и редактор усть-сысольских газет в 1919-1924 годах. В. А. Савин называл Ползунова рыцарем пера. Фотография 1921-1924 гг.
Из книги: Виктор Савин в портретах, иллюстрациях, документах / сост. Т. И. Гуляев. - Сыктывкар : Коми книжное издательство, 1988. - 128 с. : ил.
Н.-Виттор петкöдлö выль олöм чужöм. Кыдзи Нила Паладь, нывбабаяс костын уджалысь, кутас удж нуны йöз костын, велöдны выль олöмö, котыртны кооперативъясö да кыдз паныд сувтас частнöй вузасьысь Спира.Татысянь и „гартчö“ став висьтыс. Висьтыс кöсйö петкöдлыны выль-важа олöм костын тышкасьöмсö, да сійöн бур. Ме сöмын ог чайт, мый миян муын мунö сэтшöм ёсь (Виттор петкöдлöм кодь) тыш. Миян унджык вöлöстяс весиг абу частнöй вузасьысь. А висьт сертиыс позьö чайтны, мый миян эмöсь зэв гырысь вузасьысьяс, нуöны зэв ыджыд тыш кооперативъяскöд. Кыдзкö сюрöсыс абу зэв характернöй Коми мулы.
Дерт, Н. Виттор – революциялöн гижысь. Сійö оз вермы „тубыртчыны“ Коми му вывса олöмöн. Та вöсна жö гашкö и босьтö унджыкысьсö сурöссö гижны роч да украина литератураысь. Роч сюрöсъяссö „сöдзöдö“ коми олöм пыр да унджыкысьсö сылöн гижöдъясысь зэв матын сулалöны коми олöм бердас.
Кутшöм жö нелючкияс эмöсь „Олöм туйвежын“? Ме думысь, Виттор кужтöг заводитöма висьтсö гижны. Сійö вунöдöма со мый: кöть, шуам, учёнöйяс да гижысьяс – кыкнанныс велöдöны олöм, сöмын найö оз öти ногöн петкöдлöны олöмсö. Налöн уджалан кöлуйыс абу öткодь. А Виттор висьтсö заводитö гижны экономист ногöн. Олöм кыптöм фон кö колö вöлі сетны, колö мöдногаджык, литература кывйöн висьтавны гижны.
Сэсся, ме думысь, Виттор кöн сюрö неуна содталöма. Весиг кыдзкö сьöкыд гöгöрвонысö.
Эмöсь мукöд лöсьыд гижöдъяс (Ичöт Иванлöн, Шылодорса Мишлöн).
Сан-Антус
Забоев А. С. Лыдди да мöвпала… / Сан-Антус // Ордым. – 1929. – 4 №. – 50–54 л. б. – Пер. загл.: Прочитал и думаю. – Подписано псевд.: Сан Антус.
