Коми ань. Коми йöзöс садьмöдысь

Коми ань

Коми йöзöс садьмöдысь

Октябрса революция вежис быдöнлысь олöм, ставсö мöдарö путкыляліс. Нимтöмъясöс –нималіс, нартитöмъясöс мездаліс. Сэтшöм йöз, дерт, оз вермыны öти здукöн пырысь-пыр садьмыны, ёнмыны, кок йылö сувтны. Налы колöны отсасьысьяс, чуксасьысьяс, пальöдысьяс, велöдысьяс. Ми, коми войтыр, сэтшöм жö нимтöм йöз вöлім войдöр. Эз вöв миян асланым гижысьяс. Сы вöсна мед нин ёна миянöс йöз туйö.

Ӧні öтилаын-мöдлаын кывны кутісны чуксасьысьяс,, сьылысьяс, ворсысьяс, коми войтырöс сьöд вöр шöрысь югыд эрд вылö петкöдысьяс.

Коми  йöзöс чуксалысьяс пытшкысь мед гораа, мед меліа, мед гажа кылö сьылöм, ворсöм, мойдöм Нёбдінса Витторлöн (В. Савин).

Вит во чöж нин сійö Коми му пасьтала чуксасьö коми йöзлы сьöлöманыс аслас гöгöрвоана сьлан-кывъясöн: „Сьöлöм сьылöмнас“, „Ичöт дырся олöмнас“, „Тöвъя рытнас“, (став коми йöз олöмнас –сьылöмнас, бöрдöмнас, шогнас, гажнас), аслас ворсанъяснас: „Райнас“, „Водзöснас“, „Вабергачнас“, „Шонді петігöн дзоридз косьмöмнас“, лыдтöм-тшöттöм гижöднас. Коми му кузя – быд грездын, быд сиктын, быд школаын челядь дзольгöны-сьылöны, лыддьöны Нёбдінса Витторлысь гижöм-лöсьöдöм. Коми ныв-зон быд рыт гажöдчöны сійö гижöд серти. Уна том ичмонь шогсö пальöдö коми рытъяс вылын, сэні Виттор кор серамнысö петкöдлö, кор синванысö аслас сьылан-кывъяснас, ворсаннас. Весиг пöрысьяслы зэв муса Нёбдінса Витторлöн коми сьыланкывъясыс, найö сэки казьтылöны том олöмнысö, том гажнысö.

Сьöлöмсянь бурсиам Нёбдінса Витторлы уна 5 во на овны, Коми пармаöс гажöдны. Мед уна во на чуксасяс, коми войтырöс гажöдас. Кузь нэм да бур шуд Нёбдінса Витторлы!

Коми ань. Коми йöзöс садьмöдысь / Коми ань // Югыд туй. – 1923. – 1 дек.  – Пер. загл.: Пробуждающий коми народ.